利物鳥喜鵲開「大」片

猪拉多纳

哨牙蘇CCC擺擂台

雖然紅軍、喜鵲近年唔算英超頂級勁旅，但呢個戲碼卻肯定好睇，擔保娛樂性爆燈！利物浦今晚主場鬥紐卡素，射手「哨牙蘇」蘇亞雷斯腳風順，但後防卻穿晒窿；紐卡素「CCC」柏比斯施斯上季曾兩度射爆利記大門，今場勢必癲鳳鬥狂龍，兩軍吉祥物「利物鳥」同「喜鵲」互片，捧大盤！

（有線300及200台周一凌晨零時直播）
往績入波多屢創經典

紅軍同喜鵲，於英超時代最叻都只係奪亞，不過佢哋一對撼就每每創造經典，於90年代利物浦兩贏紐記4比3，入球梅花間竹，到依家依然令球迷津津樂道。近年兩軍對碰入球不絕，近9次對賽一共炮製33個入球，其中8次開出大盤，總之每次都唔會畀球迷悶親。

利物浦於羅渣士麾下，慢慢踢出悅目小組攻擊足球，重用新仔對紅軍長遠嚟講絕對係好事，史達寧、蘇索等小將初生之犢不畏虎，依家呢隊利物浦比去季進取得多，雖然只得蘇亞雷斯一個正前鋒，但佢本季已轟入6個聯賽入球，夠晒侵略性。但針冇兩頭利，踢法進取咗後防自然唔穩，就算兩大中堅史卡迪爾及丹尼爾艾格在陣，失波數字一樣高企，面對剋星柏比斯施斯，想頂得住都難。不過睇番往績，利物浦近6次喺晏菲路鬥喜鵲都發威，一共轟入16球，相信可以延續傳統。
柏比斯施斯紅軍煞星

紐卡素本季作客未贏過，但近3次都入到波，戰鬥力相當不俗。雖然今場前鋒丹巴巴亞有傷在身或者缺陣，但另一射手柏比斯施斯卻龍精虎猛好Sharp醒，上仗對西布朗轟入奠勝入球。翻查紀錄，上季紐卡素主場贏紅軍2比0，就係佢包辦兩個入波，今次面對主隊一條豆腐防線又係Show Time。今場唔好估邊個贏喇，等睇入球騷啦。