洛辛堡搶分「大」無畏

猪拉多纳

本輪挪超又有大戰，第三位嘅史卓加斯特主場對「二哥」洛辛堡，未計周六場賽事，兩軍現時都係距離莫迪三分，為保持一絲爭取錦標希望，今場毫無保留，一定以擊敗對方為目標，雙方均有超猛火力，洛辛堡更有兩名後防大將停賽缺陣，有利開大，1.48倍咪嫌少。

（周一凌晨2時開賽）

史卓加斯特季中大部分時間霸佔榜首位置，洛辛堡前周亦曇花一現做過一周一哥，但上輪聯賽不敵莫迪，將榜首位置拱手相讓，現時三頭馬車以莫迪佔有些微優勢，但一場勝負足以改變，所以今仗史軍同洛辛堡直接對碰，唔使講肯定係互劈場面啦。
史卓加斯特主場有力駁火

講攻力兩軍都夠勁，史卓加斯特聯賽27場入56球，洛辛堡則入48球，入波冠絕挪超，史卓加斯特仲有個無敵主場幫拖，佢哋由2011年6月至今，保持聯賽主場21場不敗，而且洛辛堡有隊長多辛停賽，另一中堅史特蘭貝治亦要停賽，冇咗兩支大杉喺度，更有利史軍進攻。

當然，洛辛堡一定唔會坐以待斃，明知後防唔掂，不如同你對攻，一於你入我一球，我入番你兩球，今季首循環兩軍都踢成3比3，冇得傾，今場唔係你死我亡，玩大最啱，亦可留意埋總入球「6」球甚至「7+」。