利記紅燒「喜鵲」賀大佬謝拉特600戰

猪拉多纳

周日英超壓軸戲，利物浦主場火併紐卡素，啱啱喺聯賽盃出局嘅「紅軍」家陣谷埋一肚火，今晚肯定搏老命，唔難開出2.25倍「讓球主勝」。尤其係「利記」近年喺晏菲路對親「紐記」都有贏冇輸，一於大勝一場，紅燒「喜鵲」賀謝拉特嘅「紅軍」600戰啦！

（有線200、300及廣東體育周一凌晨0:00直播）

忠心大將「謝四」今晚第600次披起「紅戰衣」出戰，翻查紀錄，原來佢係球隊史上第10個達到呢個里程碑嘅球員，日前就連傳奇射手魯殊都出嚟歌頌佢一番，咁大件事，班隊友梗係會識做，大勝一場送份大禮畀隊長啦！
周中聯賽盃留力搏今鋪

冇錯，「紅軍」周中喺聯賽盃以1:3輸畀史雲斯，表現的確令人失望，但當日領隊羅渣士收起咗唔少正選，擺明留力搏今鋪，特別係班波近16日踢咗5場波，你估唔攰嘅咩？所以周中之戰，蘇亞雷斯同謝拉特只係以後備身份踢咗半場，加上正選門神連拿今仗傷愈復出，有前有後，使驚冇波入咩！

紐卡素近期狀態無疑有所回升，近5戰取得3勝1和1負，不過想佢哋嚟到晏菲路延續氣勢，恐怕難過登天。唔係嚇大家，力奇查過往績，喜鵲對上一次喺聯賽作客利物浦贏波，已經係1994年、即係18年前嘅事。期間佢哋17次造訪晏菲路，竟然只錄得2和15負，當中近7次仲要全數落敗兼輸2球或以上，擺明畀人食到應一應。
紐記一對前鋒走晒樣

更重要一點，係紐卡素鋒力的確唔算太強，儘管賽前有消息話「喜鵲」首席射手丹巴巴亞可以及時復出，但佢新傷初愈，難免影響發揮，佢位好拍檔柏比斯施斯今季又走晒樣，防中迪奧迪又話要坐波監，攻守都唔掂，受讓都咪掂呀！
高質射手開「大」片

除咗利物浦「讓球主勝」值得捧場，今場嘅1.65倍入球大都有得諗o架！「紅軍」一向入得又失得，近10場波就有7場開出入球大，喜鵲近7戰亦有5場開大，始終「利記」射手蘇亞雷斯質素極高，紐卡素對黑雙煞丹巴巴亞及柏比斯施斯又爛船都有三斤釘，只要大家踢出水準，唔難上演入球騷。
喜鵲防線衰過紅軍

‧利物浦今季主場4戰入4球。

‧利物浦今季僅2戰冇失波，紐卡素得1戰保清白之身。

‧紐卡素近3場作客聯賽均打和。