QPR贏質素掃「雷」開齋

猪拉多纳

今季英超最冇運球隊都算係昆士柏流浪！至今仲未開齋排包尾，好在仲識咩叫做「有志者事竟成」，陣中一班星級球員功架毋庸置疑，佢哋嘅表現其實已經愈來愈好，鬥志亦一流，依家只需一口強心針就搞掂。睇嚟今晚主場迎戰同樣未贏過波嘅雷丁就係開齋好時機，小弟決定直取1.75倍主勝！

（有線200及300、廣東體育周日晚9:30直播）
哀兵雷丁士氣跌落谷底

QPR近7場聯賽2和5負，但其實輸嗰5場都係僅輸一球，證明佢哋並唔係不堪一擊嘅魚腩部隊。上場作客阿仙奴，亦只係完場前一個越位被誤判，先至輸0:1。全隊表現其實唔錯，門將施薩索拉斯身手更加係頂尖級數，格尼路、泰拉拔同埋森巴迪亞基迪等球員都好使好用。論球員質素，QPR應該算係英超中游，依家個排名絕對反映唔到佢哋嘅實力。

同QPR一樣，作客嘅雷丁到依家亦係期待住今季第1場勝利。佢哋上周中嘅聯賽盃同阿仙奴激戰120 分鐘，領先4球竟由贏變輸，呢盤照頭淋嘅冷水，無論對球員體力、士氣同埋信心都係好大打擊，佢哋領隊賽後都形容好似出席完喪禮一樣，連阿頭都咁講，試問班球員心情係幾咁低落！再者，雷丁近2場波已失咗10球，今場作客仲要哀兵出戰，輸波機會好大。
頂占筍盤：昆士柏流浪（主勝）