利華古遜變陣炒「塞」

猪拉多纳

已經連續10場不敗嘅利華古遜，今晚會於德甲主場迎戰升班球隊杜塞爾多夫，「利華」喺新帥帶領下愈踢愈有，面對賽前傳出球員不和嘅杜軍，大勝一場冇難度，當然捧1.95倍「讓球主勝」啦！

（有線61、64、201及204周日晚10:30直播）
杜塞爾多夫球員不和

利華古遜自希比亞接手後戰績穩步上揚，上場聯賽作客拜仁更爆冷贏波，終結對手聯賽全勝走勢！「利華」由上仗德盃攻入致勝球嘅小將舒賀爾尼代替比拿拉比，拍住傑斯寧火力不跌反升，要炒近3場聯賽失10球嘅杜塞爾多夫根本冇難度。

客軍接連大敗予拜仁同禾夫斯堡，聯賽連輸3場，賽前更傳出禾路連扮大牌搞到同隊友吵大鑊，隊內氣氛跌落谷底，至弊係中場奧利華芬克同科美特舒奧都要停賽，今場睇怕難逃大敗喇。