艾夫斯堡「讓主」趁熱食

猪拉多纳

瑞超煞科贏就6奪冠軍

瑞超今晚煞科，榜首嘅艾夫斯堡只要全取3分，就可以奪得創會以嚟第6次聯賽錦標，喺無敵主場出擊仲要對住隊無欲無求嘅阿維達貝治，今鋪艾夫斯堡可以話係啅硬，1.65倍「讓主」趁熱食。

（開賽時間：周日晚10:00）
阿維達貝治唔阻人發達

睇番瑞超聯賽榜形勢，艾夫斯堡目前領先次席嘅馬模2分，後者會喺另邊廂造訪AIK蘇納，主隊個拉桑達球場用埋今晚就會拆，新季會搬竇嘅AIK一來想留個美好回憶，二來要爭逐來屆歐霸盃入場券，馬模要贏波唔容易！

講番今晚主角艾夫斯堡，佢哋今季喺人造草主場近乎戰無不勝，14戰錄12勝2和，雖然中場侯爾特因為大腿傷已經收咧，好在由司職前鋒嘅大衞伊姆做「替工」鋒力更猛。來訪嘅阿維達貝治已經護級成功，戰意邊夠艾夫斯堡嚟吖？況且沙達拉同艾巴列斯上場聯賽齊齊勇戰受傷，中後場穿晒大窿，今仗睇怕都係做陪襯。