史浩克爆廠

猪拉多纳

作客都贏兩粒讓得起半一

上周末喺本土聯賽齊齊輸波嘅史浩克同阿仙奴，今晚喺歐聯B組狹路相逢，力奇睇好有地利嘅史浩克反彈，事關佢哋日前不敵賀芬咸根本係波高運低，亨特拉爾、法芬同賀治比嘅進攻鐵三角依然銳利，對住傷兵滿營嘅兵工廠讓得起半一。（有線62及202周三凌晨3:45直播）

史浩克喺上輪歐聯作客都贏阿仙奴兩球，今晚返到主場已經好值得再追，再睇埋數據，史浩克近12次歐聯主場戰只係輸過兩場咁大把，相反阿仙奴喺近13次歐聯作客，就係只得3勝2和8負，再輸多次絕不出奇。

無疑史浩克嘅5連勝走勢，啱啱喺上周末對賀芬咸嘅聯賽終止咗，不過有睇波嘅都知，當日史浩克根本係佔盡優勢一方，控球比率係65%對35%，射門次數則係22次對8次，最終史浩克輸2:3，你可以話佢哋把握力曳，但力奇會認為佢哋只係當日運氣差。事實上佢哋之前3場歐聯分組賽都各省兩球，喺各項賽事近9場就射入20球之多，火力毋庸置疑。
阿仙奴殘陣近5戰輸3場

阿仙奴呢邊，近5戰輸3場狀態衰到貼地，輸畀曼聯同史浩克都唔算太醜怪，但連諾域治都恰到佢哋就過分咗啲。老實講，佢哋條鋒線狀態又幾令人憂心，普多斯基季初虛火已過，基奧特更從來唔見影，以為翻生嘅謝雲奴又傷埋，同路斯基、戴亞比、基蘭基比斯及施捷斯尼幾個一齊做觀眾，殘陣睇怕難逃一敗。

歐聯B組
歐聯賽制

32支球隊分8組踢雙循環分組賽，每組首、次名躋身16強淘汰賽，第3名轉戰歐霸盃。