巴塞開「薩」戒吼實半場大

猪拉多纳

巴塞隆拿今晚會喺主場恭候薩拉戈薩，亨格比利捱眼瞓都會睇，事關隨住後防大將兼隊長佩奧爾復操，佢哋條防線終於齊章，尤其每逢歐聯前夕「地上最強」都踢得特別放，適逢薩拉戈薩左、右二閘都要坐波監，美斯同韋拿肯定為所欲為，1.5球中位數嘅半場大有1.68倍，一於趁熱食。（now632台周日凌晨3:00直播）
佩奧爾復出鬥薩拉戈薩

雖然阿歷斯山齊士打柴要抖4周，防守中場布斯基斯又要停賽，不過養傷多時嘅隊長佩奧爾終於可以披甲，有佢拍住周中唔使踢太公波嘅碧基鎮守後防中路，一對翼衞丹尼爾同佐迪艾巴就可以放心做側擊。

咪以為巴塞下周中歐聯要鬥莫斯科斯巴達就會勒住踢，睇番今季賽績，巴塞4次歐聯前夕出擊都贏波，每場坐底轟對手3粒，最重要係薩拉戈薩有兩閘阿巴謙明尼路同沙普拿路坐波監，艾雲奧巴杜域同蘭沙路又養緊傷，後防天殘地缺，想輸少粒都難，預計半場返入更衣室前已經傷亡慘重！