AC醞釀裁員換帥 拿玻里趁火搶W

猪拉多纳

拿玻里今晚喺意甲主場對AC米蘭，1.82倍主W值得跟進。最近拿玻里射手卡雲尼強勢復活，對上3場個人狂入6球；相反，消息話AC老闆貝魯斯干尼1個月前已決定炒教練阿里基，而且準備趁冬季轉會市場重開大裁員，縮皮踢走8個球員，咁搞法想搶分都難啦！（中央5台周日凌晨3:45直播）
貝老慳皮想踢走8件

意大利傳媒話，其實AC上個月作客以2:3不敵拉素，老細貝魯斯干尼已經冇眼睇，只不過因為未搵到合適頂替人選，教練阿里基至可以教到今日。雖然AC隨後有2勝2和1負有啲起色，但佢哋喺歐聯瀕臨出局，相信唔會令貝魯斯干尼改變主意。

報道仲話，「貝老」打算將AC一隊陣容縮減到20人，藉以減省薪酬支出，咁搞法，即係有8個球員要走啦！

同時，AC上星期再以1:3不敵費倫天拿，蒙杜利禾同柏圖爆內訌爭射12碼，而且隊長岩布仙尼要坐波監，隊中有大批球員未好番，即使拿玻里有中場比哈美坐波監，始終值得秤高，畢竟拿玻里有射手卡雲尼大爆發，對上3場喪入6球，包括歐霸盃對迪尼普食出大四喜，中場又有咸錫校炮兼後上入波，AC咁嘅身世點擋呀？