皇馬殺「迪」洩憤

猪拉多纳

貝迪斯跌Watt 球迷騷亂唔撐

近期陷入小低潮嘅貝迪斯，上場喺「塞維利亞打吡」畀西維爾大炒後引發球迷騷亂，照計班球員今晚主場出戰肯定想做番齣好戲，藉此安撫吓班Fans，可惜佢哋唔只陣容不整，仲要對住喺歐聯谷埋一肚氣要搵碇發洩嘅皇馬，睇怕都係聽做炮灰，皇馬「讓客」有1.67倍抵捧！

（now632台周日清晨5:00直播）

貝迪斯季初表現雖然唔算非常標青，但總算叫做穩打穩紮嘅佢哋，近排突然大跌Watt，主場輸畀榜下游嘅CF格蘭納達都不特止，喺「塞維利亞打吡」對住死敵西維爾，仲要被大炒五個一皮，激到班球迷喊打喊殺話要追住啲職球員嚟打，最終演變成騷亂要出動警方控制場面。
4中路守將缺陣防線穿窿

不過最重要係防守中場魯賓佩雷斯喺呢場打吡2黃1紅被逐，今晚要坐波監外，就連一對中路守將馬里奧同保拿奧都分別拉傷肌肉同大腿筋，極有可能同另一名中堅柏基斯齊齊缺陣，相信主帥梅爾要諗計點樣填番中路呢個大窿都好頭痕。

至於喺歐聯作客曼城被逼和嘅皇馬，雖然肯定以次名出線16強，但比賽期間多次出現爭議性判決，除咗令C朗為首嘅一班皇馬球員谷埋成肚氣，就連莫連奴喺賽後記招都要寸爆執法球證洛基。不過可幸嘅係法比奧干查奧繼月中傷愈復出鎮守左路，喺西甲對畢爾包後備入替嘅基迪拉，呢場仲正選上陣打足全場。喺經歷傷兵潮後陣容終於回復完整嘅「銀河艦隊」，今晚實去盡搵貝迪斯祭旗。