不來梅蓄銳主場劏利華

猪拉多纳

德甲繼續開快車，經過13輪比賽，Alwin認為雲達不來梅係最失運球隊，以佢哋嘅演出同拚勁睇，成績應該遠比目前為佳，今晚以逸待勞喺主場出戰疲兵利華古遜，有信心坐和望贏，平手盤撐主隊。

（有線64台周四凌晨3時直播）
今季做東只輸過畀拜仁

不來梅今季大換血，教頭舒哈夫起用大量年輕球員，加上人腳變動大要時間磨合，季初水準難免飄忽，不過踏入10月中後明顯已見穩定同進步，近6場聯賽3勝兩和而且水準甚高，唯一敗仗只係作客僅負於前列球隊史浩克，佢哋主場演出尤其醒神，至今6戰4勝1和，只係輸過畀球霸拜仁慕尼黑，上輪作客面對換帥後進步大嘅禾夫斯堡演出亦相當討好，年輕隊長肯特今季明顯成長，足以肩負領軍重任，加上新兵奇雲迪布尼同尼斯彼德臣已融入球隊，配合回勇嘅天才前鋒阿拿奧杜域，攻力不容忽視。不來梅今季有好多場比賽應贏變和，應和變輸，不過無損球員鬥志。連教頭舒哈夫都對球隊前途充滿信心，近期効力咗球會13年嘅重臣阿羅夫斯轉投禾夫斯堡，但取代佢出任球會經理嘅包文亦係不來梅忠臣，過去為球會貢獻良多，喺球員心目中亦地位崇高，舒哈夫好希望能夠早日為新拍檔帶嚟上任後首場勝仗。
利華疲兵舉步維艱

客軍利華古遜目前比不來梅攞多6分，今季嘅整體演出已經較預期更好，尤其箭頭傑斯寧大踢爭氣波，不過兼顧歐霸盃令佢哋疲於奔命，近期球員體能明顯出現問題，上仗作客賀芬咸早早取得兩球領先優勢，但到下半場舉步維艱，仲差啲畀對手追和，今晚開快車匆匆再戰未必回到氣，作客面對以逸待勞嘅不來梅睇低一線。
Alwin 推介：

雲達不來梅平手盤★★★★

禾夫斯堡下盤★★★

柏林聯平手盤★★★