新加坡印尼「大」打出手

猪拉多纳

雖然和都有着數，但係新加坡今屆參戰東南亞錦標賽嘅目標，就係進行「進攻足球」實驗，今晚佢哋對住有贏波壓力嘅印尼，相信會係拳來腳往嘅對攻，2.10倍入球大博得過。

（now 671台周三晚6:00直播）

外號「雄獅」嘅新加坡响B組開咗個好頭，首戰就數咗主辦國之一嘅馬來西亞3蛋，由於佢哋尾場對實力較次嘅老撾，理論上今日對印尼和都冇蝕底，但係大家千祈咪咁諗，事關新加坡個教頭阿夫拉莫域今次揀咗10個中場，4個前鋒，後衞只得5件，講到明今次要踢進攻足球，又點會突然縮番條槓玩防守吖！
印尼籌旗參戰要交代

仲有一點大家要記住，新加坡嗰件前鋒杜歷治成42歲，係今屆最老嘅參賽球員，佢老人家玩埋呢水就收山嘞，梗係想省多兩球榮休啦，你睇佢上一場後備上陣都搏甩髀，仲一頭撼穿咗馬來西亞大門省番粒，就知佢仲好好火。

印尼第一場波2:2逼和牌面最弱嘅老撾，可以話執番身彩，佢哋最大問題在於換咗太多球員，搞到欺善怕惡，熱身賽除咗5:0贏咗隊跛嘅汶萊，對越南兩戰都打和，又試過淨吞北韓兩蛋，實力比唔上爭標熱門新加坡。而且印尼男足因為政府遲遲冇撥款，搞到要由足總出面籌旗，求啲商家、企業私人醒，先至湊到10萬零4千美元，應付今次參賽開支。伸手問人攞得錢，好好醜醜都要做番啲嘢吖，今日如果又贏唔到，都唔使點樣諗出線咯，焗住佢哋要同新加坡搏拳，「大」打出手。
東南錦賽制

8支球隊分2組，每組4隊進行單循環分組賽，每組首2名將進身4強。