卡坦尼亞「主」死AC

猪拉多纳

地頭蝦蝦霸霸不敗率78%

今晚意甲獨腳戲隨時吹冷風，卡坦尼亞喺主場對AC米蘭，受讓平半有權爆出！話晒卡坦尼亞喺西西里島主場惡過社團人士，AC由教頭、隊長同門將都係等住執包袱，上場靠運氣砌低祖雲達斯，今場鬧中堅荒睇怕唔會咁好彩！（廣東體育周六凌晨3:45直播）

雖然冇人夠膽話，位於黑手黨發源地西西里島嘅卡坦尼亞同黑幫有關，但無論點，其他球隊作客呢個地方的確非常識做同畀面，09至10年球季至今卡坦尼亞聯賽主場有33勝17和14負，不敗率高達78%，今季主場更只輸過畀榜首嘅祖雲達斯，連拿玻里同拉素都贏唔到佢哋！
AC鬧中堅荒又洩氣

或者射手貝基斯奧養傷，中場艾真度高美斯同後衞尼高拉斯史普利停賽，將會削弱卡坦尼亞嘅搶分能力，但其實對家AC仲大鑊，除咗正選中堅邦利拿未好番，頂替佢嘅耶比斯又要停賽，加上防線重心麥薩斯已經連續幾場帶傷上陣，今場紅黑兵團保持清白機會好低。

如無意外，AC今場要用副選中堅沙柏達華倫西亞擔大旗，但咁未算最令人擔心，事關教練阿里基承認，上場贏祖記嘅12碼係球證錯判，暗示唔值得勝出，而且隊長岩布仙尼同門將艾比阿迪，據講打埋今季會被踢走，阿里基本人就更唔在講，士氣咁曳點捧得落手？
紅黑兵團作客冇運行

‧卡坦尼亞近5場有4場開入球大。

‧卡坦尼亞近7場得1場上半場有波入。

‧AC米蘭連續8場有入球。

‧紅黑兵團近5場聯賽作客得3和2負。