海豚落飛大有作為

猪拉多纳

尋日第二場五班泥地1200米，如果開閘前跟「落飛黨」買就掂啦！事關苗禮德旗下參戰馬「海豚」，相隔一年多重回泥地作賽，賽前大部分時間獨贏賠率都守喺十倍左右，點知閘前突然票如雨下，一下被打落四點五倍，最終亦順利一放到底，而Ｑ搭第二名嘅「大有作為」連贏位亦着啡燈，派515.5元相當和味。
       

而替「海豚」打開泥地勝門係苗禮德福將李寶利，連同上周三策騎「無敵駿駒」取得個人今次客串首場頭馬，已連續兩期賽事為練者建功。
       

至於「海豚」回師泥地即贏馬，苗禮德就話呢匹美國五歲馬來港前憑泥地起家，配合今季大熟大勇，賽前對爭勝有很大信心，另外今場因排內檔，故一改跑法為前領，結果李寶利完全發揮出賽前部署，重奪頭馬居功至偉。