喜鵲甩皮甩骨捧韋根

猪拉多纳

法國孖寶傷晒 冇埋中後場骨幹

「喜鵲」甩皮甩骨，主場都插翼難飛！聽日凌晨英超獨腳戲，「喜鵲」紐卡素喺聖占士公園球場迎戰韋根，有卡比耶、賓艾化、史提芬泰萊及艾美奧比等主力缺陣，聯賽四連敗仲有排衰，捧韋根「讓球客勝」！（有線300及200台周二凌晨4時直播）

紐卡素去季踢到曉飛，丹巴巴亞同柏比斯施斯當然最搶眼，但若非卡比耶同賓艾化喺中場穿針引線，「黑雙煞」都好難也文也武。卡比耶簡直係「喜鵲」近年最佳收購，勁到穩坐法國國家隊正選，瞻前顧後作用極大，屬球隊攻守大腦。而「麻煩友」賓艾化雖然周時貪功，但有佢喺度紐記創造力直線上升，呢對「法國孖寶」先係球隊靈魂。近期佢哋齊齊因傷缺陣，紐卡素即時變得非常平凡，中場淨番迪奧迪、約拿斯古迪利斯、安尼達等打仔，穩陣有餘靈氣不足，惟有靠「黑雙煞」單打獨鬥，但因目標太大，而且狀態又唔標青，對手要嘜死佢哋唔難。
韋根慢熱要埋「半場和」

另外，紐卡素後防大將史提芬泰萊倦勤，就靠晒隊長高洛仙尼清波；而中後防「通天老倌」白治，今仗又因攞夠黃牌而停賽，領隊柏杜就算見到形勢不妙亦難以變陣。紐記飽受主力缺陣影響，近四場英超分別輸畀韋斯咸、史雲斯、修咸頓同史篤城，狀態沉成咁，讓波要唔過。

講真韋根都唔算叻，但近期作客贏過熱刺，而且近3次造訪紐卡素有2次保持不敗，往績完全唔輸蝕。另外，韋根一離開主場就以慢打快，大軍控球技術唔曳，上半場經常成功控制住節奏，所以今季6場英超作客全部開出0比0，今仗「半場和」都可以考慮。