車路士擦魚腩 等「出線奇迹」

猪拉多纳

今晚歐聯，衞冕嘅英超豪門車路士，會喺E組主場迎戰丹麥勁旅洛斯查蘭特，雖然「車仔」要靠奇迹先出到線，不過凡事都有可能嘅，「藍戰士」上季咪一樣製造過「迪馬堤奧奇迹」囉！家陣備受壓力嘅賓尼迪斯，至少要攞番場漂亮勝仗減吓壓，讓球主客和開到「-2」，1.87倍「讓球主勝」依然值得捧場！

（有線62及202周四凌晨3:45直播）

賓尼迪斯家陣要先丟開聯賽未開齋嘅煩惱，另方面亦要諗計複製上季「車仔」「歐聯奇迹」。查實車路士近年都幾得意，搵臨時領隊教波往往有意外驚喜，希丁克同上季嘅迪馬堤奧就係最佳例子。迪馬堤奧上季以看守領隊身份接替被炒嘅保亞斯，結果一舉捧走足總盃同歐聯冠軍，之後仲坐正做埋「車仔」領隊添。
洛斯查蘭特5戰失16球

賓尼迪斯「有辦睇」，梗係想歷史重演啦！而大家喺插賓帥嘅同時，亦要諗番呢位西班牙籍主帥係盃賽專家，之前佢就試過帶住人腳質素一般嘅利物浦捧歐聯，又試過帶華倫西亞捧走歐協盃（歐霸盃前身），即使車路士目前排小組第三，今場唔單止要贏，同時仲要望祖雲達斯輸畀薩克達先可以出線，但講到底，機會係要自己把握，賓帥係時候做番齣好戲喇！

對家洛斯查蘭特依家排喺小組包尾，連個第三轉踢歐霸盃嘅機會都無，你睇吓佢哋嘅戰績，之前踢咗5場歐聯勁失16球，包括首循環鍊車慘吞4隻光蛋，作客祖雲達斯又係輸4球，上輪主場仲要畀薩克達數5:2，證明呢隊丹麥冠軍同歐洲頂級球會嘅實力，根本唔足以喺歐洲戰場立足，今鋪去到史丹福橋，相信都難逃被炒厄運咯！

歐聯E組
頂占筍盤：車路士（讓球主勝）