阿德大佬缺陣 勝利乘機抽水

猪拉多纳

上場缺少正印門將加利高域嘅阿德萊德聯，最終輸畀中岸水手，可見呢位隊長門神有幾咁重要。「阿德」今日續以殘陣出戰墨爾本勝利，少咗支「定海神針」，根本冇本錢讓波，一於撐墨爾本勝利1.65倍+1「讓客」。

（有線64及204周五下午4:30分直播）
隊長門神踢東亞盃

阿德萊德聯今季戰績唔錯，只可惜陣中大佬加利高域繼續代表澳洲征戰東亞盃而缺陣，從上仗所見，班守將一冇咗隊長提場，條防線騰晒雞咁完全唔掂，就算中場核心維度錫克服膝部傷患，今仗有望落場擔任指揮官角色組織攻勢，但始終啱啱復出，狀態真係靠唔住。

對家墨爾本勝利都有艾奇湯臣同米利根兩位袋鼠兵缺陣，但中堅森加拉查坐完波監，可以拍住隊長利查扼守中路，最重要係上場為球隊一箭定江山嘅左翼馬高洛查士，夾埋右翼納博特今季已經攻入8球，而且仲有古希美同馬高斯科利斯呢對創造力十足嘅南美兵派牌，絕對有條件坐和望贏。