利物浦冇蘇亞雷斯 難扑錘

猪拉多纳

同市褪色勁旅利物浦作客韋斯咸一樣危機四伏，紅軍實力自上季起急跌，尤其隊長謝拉特因傷患和年紀而出現退化迹象，加上主力射手蘇亞雷斯今仗停賽，令紅軍立即變成盲頭烏蠅，反觀主場嘅韋斯咸近期大勇，「錘仔幫」有力揼扁紅軍，受讓平半捧下盤。

（有線300及200台周一凌晨零時直播）
紅軍鋒將唔識入波

紅軍依家靠烏拉圭射手蘇亞雷斯獨力撐起，「哨牙蘇」今季包辦紅軍聯賽一半以上入球，今仗冇咗佢，戰鬥力大減；而韋斯咸則剛於主場砌低車路士，今季擁接近9成不敗率，主場受讓豈有不捧之理？

現時利物浦踢嘅係小組攻擊戰術，但衰在得分點唔多，幾個正選如史達寧、蘇索、舒維爾等，夾埋竟然只入得1球；而謝拉特亦不再神奇，入得2粒咁大把。今場冇咗蘇亞雷斯，預料紅軍會焗住搵舒維爾打箭頭，以佢嘅卡士實在好難有運行。講多個數據，本季佢哋作客聯賽入10球，只有謝拉特同紐尼沙軒各入過1粒，今場真係冇眼睇。
韋斯咸主場Sharp醒

韋斯咸上仗落後一球下，換邊後連入3粒反勝車路士，士氣旺盛。事實上「錘仔幫」今季喺自己地頭好Sharp醒，9場聯賽只係輸過畀阿仙奴，雖然安祖卡路爾礙於借用條例唔能夠上陣倒戈，但另一箭頭卡頓高爾好弗，路蘭後上更加煞食，加上中後場相當穩陣，面對攻力疲弱嘅紅軍唔難應付，今仗主場再獲受讓平半真係筍爆，下盤有計，隨時贏埋！