泰國超班強爆馬來西亞

猪拉多纳

東南亞錦標賽4強首回合重頭戲今晚上演，馬來西亞喺主場對泰國，受讓都要唔過。上屆冠軍馬來西亞目前傷兵滿營，好難撻得着，相反3屆冠軍泰國喺最後1場分組賽收起部分正選，依然3戰全勝強勢出線，有條件食住上開1.95倍客W！

（now670台周日晚8:00直播）
「馬來虎」傳5件唔踢得 睇片谷士氣

賽前傳出馬來西亞有5將受傷，當中喺分組賽交出1個入球、兩次助攻嘅翼鋒溫格證實肯定唔踢得，其餘傷兵包括中場沙卡利亞里、古蘭倫同梅希文森比傷勢冇咁重，但都未必可以打正選。至於上屆神射手穆沙利，今屆得1個入球本身已經唔掂，即使消息話佢踢正選，帶傷上陣咪更靠唔住。

雖然落選嘅「馬來虎」華裔國腳楊孔雍大爆，教頭積高彭習慣賽前安排觀賞體壇巨星短片，例如米高佐敦、泰臣嘅風光史振奮軍心，可惜佢哋傷兵多，分組賽又試過淨吞新加坡3蛋，對住分組賽連贏兩場提早出線後，派副選都贏越南3:1嘅泰國，真係唔易啃，特別「白象」泰國今場得副選前鋒辛杜菲特停賽，幾乎夫添應戰抵捧得多。
賽制

採主客兩回合淘汰制，今輪為4強首回合，若總比數相同，作客入球較多一隊晉級，再和則於次回合後加時作賽。若加時入球數字相同，客隊將憑作客入球優惠晉級，若加時沒有入球，則互射12碼決勝。