恩格斯下季跑國際賽

猪拉多纳

大摩響尋日國際賽又擺強陣出馬18匹，雖然未至於上次響馬會盃賽日出21隻全軍盡墨，響四項大賽就四大皆空，但仍憑「恩格斯」及「勝利之星」起孖。大摩就對前駒睇得好高，並且揚言只要進度正常，肯定就會成為來屆國際賽嘅主隊一分子。
       
恩格斯連勝三仗，勢如破竹。

睇番上季運港嘅英國自購馬「恩格斯」，上季表現就麻麻地，不過在暑期閹後，踏入今季就真係脫胎換骨，連埋擒日跑咗四場，除頭場涉及入錯閘廂跑輸咗之外，已經係連中三元，而三場頭馬更分別嚟自谷草、泥地同埋田草都贏過，都可以講係一個三連勝嘅特別紀錄，亦足以證明呢匹係場地全材嘅短途佳駟。
       
恩格斯台前幕後搭晒膊頭影威水相。

大摩近年主打歐洲自購馬，其實亦有兼顧番旗下嘅短途兵力，「恩格斯」今戰已經肯定咗佢嘅地位。至於身為馬主嘅蕭劍新，擒日佢地蕭氏族亦見大出擊，雖然只係得呢場溫拿，連埋霍廐06/07練馬師團體馬「智多飛」跑第四，整體成績都算唔差。