喜鵲+1搞破壞

猪拉多纳

富咸折箭死晒火

英超本周壓軸戰由富咸主場對紐卡素，富咸今季換血後季初演出唔錯，不過，自從中場大腦拜仁雷斯受傷後，大軍前線完全死火，對上3場都冇士哥，唔識入波點讓人？一於捧紐卡素「讓球客勝」！

（有線300及200台周二凌晨4時直播）

富咸季前放走兩大主力丹普西及迪比利，唔少朋友擔心班波冧檔，教頭祖爾安排哥斯達黎加球星拜仁雷斯頂迪比利個位校炮，效果理想，另一進攻主力貝碧托夫停到波，而且射術精湛，兩個瀟灑哥喺前場合作無間，踢落都幾好睇。
貝碧托夫孤掌難鳴

不過，拜仁雷斯早前勇戰受傷，祖爾搵咗貝碧托夫墮後分波，牽一髮動全身，即時連續3場冇士哥，好難搞，今戰即使後防重心軒治蘭特停賽期滿復出，睇怕都幫唔到幾多。

紐卡素今戰亦唔齊腳，中場主將卡比耶繼續養傷，無論搵邊個頂都發揮唔到相同作用，既然創造力下降，咁就要加強防守搞破壞喇，大軍後防只有中堅史提芬泰萊養傷，其餘主力都可落場，有阿根廷中堅高洛仙尼撐住，唔怕富咸進襲。「喜鵲」進攻靠晒塞內加爾黑雙煞丹巴巴亞同柏比斯施斯，前者今季保持高產，兩個射手級數高，同樣可以自己搵食，有力爭取士哥，預期「喜鵲」可保不敗，要「讓球客勝」。