廠仔強陣打爆巴拉福特

猪拉多纳

難得抽好籤，盃仔都照殺

英聯盃嚟到8強，近年深陷錦標荒嘅阿仙奴今晚作客英乙球隊巴拉福特，難得遇上實力較次嘅對手，兵工廠當然希望盡地一煲，攞番隻盃仔都叫做對班死忠球迷有個交代吖！撞正巴拉福特今場志在搵錢儲軍費多過贏波，強陣出擊嘅阿仙奴絕對有力大炒一鋪，1.83倍「讓客」捧得過o架！（開賽時間：周三凌晨3:45）
7年錦標荒雲格唔敢玩嘢

阿仙奴早排戰績差，不嬲唔肯揼水畀雲格買人嘅老闆居然有大把閒錢去買巨型農場，班粉絲梗係躁爆，呢個時候商務總監霍湯姆居然仲撥火：「對阿仙奴嚟講，贏波唔係代表一切囉！」大佬呀，阿仙奴話晒都係英超傳統勁旅，球迷對成績有要求都好合理啫！況且佢哋已經有7年冇捧過盃，家陣英超基本上已經無望，歐聯又難爭，硬食球迷怨氣嘅雲格為咗平息眾怒，梗係會出盡力希望爭番個聯賽盃啦！

雲格賽前已經講明，咁難得殺到入8強兼抽到好籤，一定會強陣出擊務求殺入4強搶盃，最多只會收起2、3個常規正選咁話，聽落會係一場誠意之作、有力大炒喎！都係嘅，近排佢哋風頭火勢，如果對住巴拉福特都贏唔到，小妹真係擔心雲格同班廠仔冇命返倫敦呀！
英乙巴拉福特志在搵錢

巴拉福特近況唔差，喺上周末英乙絕殺托基聯袋走3分後已經5場不敗，但以乙組班底嘅質素，要同阿仙奴班生牯仔鬥真係有難度。不過呢，小妹就發現佢哋嘅領隊菲爾柏堅遜同雲格有個共通點，就係勁識為球會盤數着想，菲帥喺賽前話：「呢場波令球會曝光率提升，仲幫我哋賺番筆軍費添！」的而且確，呢場波嘅門票一開售即刻引嚟球迷排長龍搶飛，但柏堅遜咁講，擺明當今場係表演賽啫！想搵多個錢喺轉會窗增兵係好事，但抱住咁嘅心態，今場想唔畀廠仔數幾粒都難呀！
兩隊旺開半場細

‧巴拉福特同阿仙奴上次碰頭要追溯至00/01賽季英超，當時阿仙奴主場贏2:0。

‧阿仙奴近6場有5次開出半場入球細。

‧巴拉福特10場主場有7次開出半場細。
博阿仙奴半場唔識入波

雖然話阿仙奴強陣出擊，要炒對手冇問題，但查實兵工廠一向唔興喺賽事早段入波，睇番球隊近6場亦只得3球係換邊前射入，加埋巴拉福特仗住主場之利，上半場有氣有力嗰陣未必咁易就範，大部分入球好可能會喺下半場至出現，1.62倍半場細撐得過。
蘇、英足總盃、英聯盃及意盃賽制

蘇格蘭足總盃為第4圈重賽，英格蘭足總盃為第2圈重賽，英格蘭聯賽盃為8強戰，意大利盃為16強戰，4項賽事均以一場過分勝負，若法定時間內打成平手，則需加時作賽，再和就互射12碼決勝。