史雲斯貪盃發狂攻陷米堡

猪拉多纳

盃賽一場定生死，鬥心最緊要。英冠仔米杜士堡今晚喺英聯盃8強造訪史雲斯，未必搏盡，事關米堡近排跌Watt，要重返英超，根本冇空間分心踢盃仔，相反英超奇兵史雲斯無降班之憂，可以盡力搶盃，鬥心同質素都贏晒，1.52倍主勝夠晒穩陣。

（開賽時間：周四凌晨3:45）
米堡話明留力爭升班

米堡喺今季英冠開咗個靚頭，可惜近5戰輸3場，被榜首卡迪夫城拋甩6分，領隊莫比利亦覺得係時候放棄聯賽盃，日前佢喺記者會暗示會留力周末英冠鬥狼隊，梗係啦，升上英超同掘金礦冇分別，你話班球員同高層會點揀吖？

主隊史雲斯上仗聯賽對諾域治，上半場發夢輸3球，下半場瞓醒力追輸3:4，領隊米高盧特立賽後省到班球員立立令，話佢哋太輕敵，相信班兵今晚會醒醒定定，唔敢再大意。事實上，史雲斯狀態真係唔錯，對諾域治前一度保持7場不敗，當中更砌低過阿仙奴、賽和車路士同利物浦，實力唔嘢小，加上門將禾姆傷愈，又有比尹佩斯、蘇亞雷斯更高效嘅「入球王」米捷助陣，要攻陷米堡，根本冇難度。
英聯盃賽制

英聯盃為8強戰、英格蘭足總盃為第2圈重賽，蘇格蘭足總盃為第4圈重賽，3項賽事均以一場過分勝負，若法定時間內打成平手，則需加時作賽，再和就互射12碼決勝。