熱刺「大」到你雲

猪拉多纳

防線穿窿好彩前鋒醒神

英超實力分子熱刺今輪主場對史雲斯，熱刺繼續折翼，左腳王加里夫巴利仲未踢得，大軍上場尾段失魂反勝為敗，再次暴露後防弱點，今場讓波信唔過，蘇豪反而留意到熱刺近期入得又失得，今場捧大盤最好！

（有線300及200台周日晚9時30分直播）

熱刺上仗聯賽惡戰愛華頓缺少加里夫巴利，換邊後雖然憑丹普西先開紀錄，踢落唔曳，點知喺下半場補時三分鐘內連失兩粒慘敗，後防重現季初遊魂狀態，完全唔掂。熱刺中路始終欠缺一位星級鐵衞，哥爾卡經驗不足，加拿斯老化退步，維頓漢亦非大將之材，今次面對史雲斯當弗射手米捷睇怕又有排騰，就算有主場之利亦難保不失。

熱刺後面唔掂，好在射手迪科爾長期交到貨，多哥中鋒艾迪巴約近排亦弗番，前面火力強勁，大可以攻代守，佢哋近四次主場出擊全勝兼全大，絕對入得又失得。
史雲斯打起信心鬥攻

史雲斯係英超打小組足球最好嘅球隊，之前作客阿仙奴鬥技術同短傳組織不落下風，最終仲憑米捷尾段入兩球贏埋，球員打起信心之後，今次對住另一倫敦球會熱刺完全未驚過！史雲斯以往主場叻啲，近期連作客都一樣掂，對上四次贏三場，先後砌低阿仙奴、紐卡素同利物浦幾支硬嘢，真係唔講得笑。

史軍除咗米捷識入波，邊路進攻球員柏保路靴南迪斯同魯迪治亦不時切入中路埋門，計進攻瓣數絕對唔少得過對手。熱刺上季主場對史雲斯贏三比一，今次再度碰頭，預期入波都唔會少，今場捧大啱數。