阿仙奴「大」發雷霆

猪拉多纳

聯賽盃出局火都嚟

今輪英超壓軸戰，雷丁主場對阿仙奴，兵工廠上周中聯賽盃被乙組仔巴拉福特淘汰，簡直係奇恥大辱，球迷固然火滾，球會高層亦罕有表達不滿。領隊雲格及眾將士備受重大壓力，今仗必定要爭取大勝省番靚招牌。雷丁屬於主場「神經刀」，專同強隊做「大」戲，入球大屬於不二之選。

（有線300及200台周二凌晨4時直播）

阿仙奴上仗聯賽盃強陣出擊，竟然贏唔到巴拉福特，畀外人笑到面黃，連一向話獎盃唔代表一切嘅球會行政總裁加斯迪斯都忍唔住，批評球隊表現，仲焗住向球迷道歉，可謂面目無光。因此，高層非常重視今場勝負，落「柯打」必須攞齊三分。

其實聯賽盃恥辱性失利，對於雲格及陣中球星而言，亦難以接受，話晒佢哋都係有頭有面人士，當然啃唔落呢口氣，如果今仗都唔做齣好戲，以後點見人呢？勢必豁出去強攻，爭取漂亮勝仗。
雷丁有鋪開大癮

雷丁近況的確好差，已經5連敗，但要留意其中4場係作客，佢哋主場經常有「神來之筆」，包括聯賽盃90分鐘同阿仙奴打和4比4。早前聯賽上半場已同曼聯炮製七個入球。唔好忘記仲有同富咸打和3比3等大比數賽果。雷丁今仗未必可以喺兵工廠上身搶到分，但以佢哋主場豪邁表現，好大機會入波，入球大最穩陣。