馬賽搶W過快樂「聖」誕

猪拉多纳

中場華布拿願續約士氣升

今晚馬賽將迎來法甲歇冬前最後一戰，坐鎮主場迎戰聖伊天！聯賽兩連勝嘅馬賽近況終於有起色，同時陣中盛傳離隊嘅主力亦示忠，喜訊一單接一單，一於敲1.8倍主W，睇好佢哋保住歐聯席位過冬啦！

（開賽時間：周一凌晨4:00）

馬賽經歷歐霸盃出局嘅傷痛後，似乎已經收拾心情朝住下季踢歐聯嘅目標進發喇！佢哋近兩場都贏波，係近3個月以嚟首次獲得連勝，今季易帥後獲「解凍」嘅中場華布拿表現亦相當出色，雖然佢曾經同阿仙奴等大球會扯上關係，但近日就示忠話想簽新約，仲話已經同球會方面傾緊，至於主將雷米加盟紐卡素嘅消息本身更有傳已經成事，但會長拉布尼就講明唔會賣，相信會進一步提升隊內士氣。
聖伊天近5戰食白果

客軍聖伊天方面，雖然話佢哋近9場作客都未輸過，但查實佢哋戰績每況愈下，近5場不勝之餘仲要1球都入唔到，前鋒白蘭達奧養傷之餘，奧巴美揚收咗對超浮誇「水晶砵」後就冇入過波，似係中咗咒多啲喎，加埋今場有後衞巴耶沙爾停賽，攻不銳守不穩都咪話唔牙煙。難怪上場有「士哥」嘅馬賽前鋒基格納，仲勁有自信咁話會用主場優勢打爆聖伊天，小妹絕對睇好佢講得出做得到！