拖肥平靚正 唔驚貴價車

猪拉多纳

2012年最後一個英超賽日一樣有壓軸好戲碼，愛華頓喺主場迎戰車路士上演「藍色大戰」，如果要講今年最令人驚喜球隊，愛華頓絕對榜上有名。拖肥糖雖然平時唔多起眼，但竟高踞聯賽榜前列位置，謝拉域、派拿同奧士文等平、靚、正球員踢落唔差得過費蘭度托利斯、夏薩特等車仔貴價兵，愛華頓主場平手盤梗係撐佢哋啦！

（有線200及300、廣東體育周日晚9:30直播）

愛華頓領隊莫耶斯一直被譽為英超最佳領隊之一，全因佢可以用有限資源踢出極好成績，拖肥糖近年雖然放走咗阿迪達、卡希爾同魯迪維爾等球星，但球隊年年戰績都冇乜受影響，莫耶斯補入嘅謝拉域、米拿拉斯同派拿全部都係身價低廉而又好使好用，真係不得不畀個讚佢！

主場不敗韌力十足
唔經唔覺，愛華頓喺英超已經7場不敗，拎到3勝4和成績 ，勝率雖然唔算好高，但證明呢隊波韌力非凡，等閒之輩好難贏到佢哋，就算中場費蘭尼今晚要停賽，愛華頓依然搵到人填補空缺，加上佢哋今季喺主場不敗嘅驚人戰鬥力，坐和望贏唔係天方夜譚。

殘車踢到攰隨時死火
客隊車路士喺賓尼迪斯執教下愈踢愈好，不過嚟到聖誕快車中段，阿占就擔心佢哋嘅體能會受影響，大家唔好忘記車仔月中山長水遠飛去日本踢世冠盃，一返到英國又要兩、三日踢一場，開頭都話可以憑意志頂住，但嚟到快車中段隨時會出現疲態，今晚作客真係信唔過！

拖肥糖主場必有波入
‧愛華頓今季主場未輸過。

‧拖肥糖所有主場賽事都有波入。

‧車路士近8場只有2場保持清白身。

‧兩隊近6次對賽5場開細。

快車踢得密留力做「細」界
愛華頓中場費蘭尼停賽，攻擊力可以話冇咗一半，相信教頭莫耶斯今場都係先求穩守。車路士對維拉大勝一場，相信已經攞番唔少球迷信任，今場目標攞3分就夠，冇必要去到盡大數對手。況且嚟緊繼續開快車要留力，相信兩邊教練都唔會要班球員鬥攻，既然兩隊對賽入波唔多，敲1.88倍細有着數。

頂占筍盤：愛華頓（平手）