黑貓發惡踢殘利物浦

猪拉多纳

爛仔波專恰少爺兵

英超利物浦主場撼「黑貓」新特蘭，紅軍唔襟撞難靠！紅軍上仗大炒昆士柏流浪，全因對手冇做好緊身攔截工作，早前對維拉、史篤城，人哋波到人到，就搞到紅軍冇晒符。新特蘭一向擅踢爛仔波，作客更加主守，令主隊一班唔慣打硬仗嘅「少爺兵」更難搵着數，作客受讓捧「黑貓」讓球客勝！

（有線301及201台周四凌晨3時45分直播）
演出飄忽戰術單一

近期利物浦演出飄忽，近4戰勝負單跳，表面上難以捉路，但查實亦有迹可尋。大數富咸及ＱＰR兩仗，利物浦攻勢水銀瀉地，遠轟近射乜都齊，踢得悅目又有效率，講真都幾好睇。不過，輸畀阿士東維拉同史篤城嗰兩場就完全走樣，領隊羅渣士喪鬧班波表現時好時壞，其實錯不在球員，要怪就怪羅帥戰術太單一，冇因應對手而做好相應調整。

紅軍大勝嗰兩場波，對手都懶懶閒由得紅軍造波，咁樣當然易贏；但查實紅軍唔係巴塞，如遇上對手波到人到，就會即時死火。維拉屯重兵於後防，一個賓迪基已玩謝紅軍防線；而史篤城就贏得更輕鬆，足以證明利物浦應付唔到「爛仔波」。另外，荷西安歷基受傷今仗缺陣，對紅軍可謂牽一髮動全身。格連莊臣或會被迫串演左閘，右閘出番韋斯頓，紅軍攻守能力都有所削弱，要攻破新特蘭防線更加困難。
新特蘭對賽往績佳

新特蘭於聖誕快車表現唔錯，擊敗曼城顯示強大防守力，而上仗鬥熱刺，如非古拿擺烏龍，亦好有機會搶分成功；事實上，「黑貓」近3次鬥紅軍都未輸過。奧尼爾老謀深算，絕對能輕易睇穿紅軍弱點，一班打仔已經磨拳擦掌，誓以硬淨衝撞戰術同利物浦「開年」！

猪拉多纳