撐紅軍「半場大」捉黑貓

猪拉多纳

利物浦今晚喺英超主場對「黑貓」新特蘭，不妨試吓玩半場入球大，最近紅軍不斷放風話要買人加強火力，激發蘇亞雷斯大爆發「騷哥利」，保住自己嘅王牌射手位置，加上領隊羅渣士有望復出領軍，完半場前入夠兩粒開半場入球大應該唔難！

（有線201及301周四凌晨3:45直播）

傳聞利物浦對韋拿、史杜列治、韋費特沙夏同加美路有興趣，可能怕辛苦得來嘅紅軍新王地位動搖，近期蘇亞雷斯以Top Fit狀態迎接快車賽事，對上3場入3球，包括日前梅開二度助利物浦以3:0大勝昆士柏流浪，連續5場開半場入球大，既然「蘇神」肯畀心機踢，要攻破新特蘭防線應該唔難，半場入球大值得再追。

新特蘭剛戰以1:2不敵熱刺，輸波之餘仲有防線支柱奧沙再傷，而且拍檔布朗證實今季冇辦法傷愈復出，領隊奧尼爾正頭痕用咩中堅組合抵擋紅軍炮火。不過考慮到新特蘭最近表現已經有起色，至少連續8場有波入，撞啱利物浦門將連拿穩健程度降低，玩半場入球大有着數。