文帥怕死曼城作客阿仙奴獻細

猪拉多纳

今輪英超壓軸好戲，阿仙奴近期變咗濕水大炮，喺主場出戰保守怪曼城難作惡。兵工廠今季遇強即屈，板櫈深度又唔夠，辛迪卡索拉、禾確特、基奧特等火槍手缺少輪換下踢到殘晒，不過曼城作客強隊例牌以穩行先，自文仙尼執掌「藍月亮」後，兩軍碰頭通常冇乜交收，呢場入球細最值博。

（有線300及200台周一凌晨零時直播）

之前阿仙奴先後大炒雷丁5比2、狂轟紐卡素7比3，中前場核心辛迪卡索拉、普多斯基、基奧特、禾確特個個着晒火，輪流發威，攻力之強令人咋舌。不過，該隊後備力量始終不足，領隊雲格仲將查馬克、佐羅借走，又未有補入新血，喺聖誕及新年快車嘅頻密賽期催谷下，一眾主力冇乜點休息，已經疲態畢露，近兩仗作客唔算太強嘅修咸頓及史雲斯均和波收場，狀態明顯回落，何況佢哋今季對車路士、曼聯等勁旅亦輸波，有主場之利都信唔過。
近5聯賽作客酋長球場零入球

曼城亦唔好得幾多，阿根廷射手阿古路因傷倦勤，拿斯尼仍要坐波監，連能攻善守嘅核心耶耶托尼，因為參加非國盃關係已返番科特迪瓦國家隊報到，今仗唔使預佢，咁搞法對攻力及創造力大受影響。另外，佢哋作客對親強隊都穩陣行先，自文仙尼擔任曼城主帥後，7次出戰阿仙奴中只係贏得兩場，並有6次開入球細，證明呢位意大利領隊總係畏首畏尾，況且「藍月亮」近5次聯賽作客酋長球場未入過波，上次聯賽作客贏阿仙奴已經係37年前嘅事，於陣容不整下，唔好期望會踢得好進取。雙方各有隱憂，呢場唔慌多波入，因此捧細盤最好。