南非歎慢板博半和

猪拉多纳

1分都夠食住摩洛哥出線

非洲國家盃分組賽踏入最後一輪，各支非洲雄師又係時候睇分做人，目前手執4分坐喺A組榜首嘅南非，今場只要唔輸就肯定出線，對手摩洛哥則與佛得角同分並列次席，限於實力同踢法，想搏都未必惡得出樣，1.92倍「半場和」制得過。

（now676台周一凌晨1:00直播）

雖然話實力名氣兼備嘅麥卡菲同派拿都唔喺陣中，不過主辦國南非表現仍然冇太大走樣，首場揭幕戰穩陣應戰賽和佛得角後，跟手迎戰安哥拉亦都搏殺成功，憑住辛維尼同馬祖路嘅入波以2球淨勝對手，成功搶到4分之餘，更手握A組出線嘅主動權。今場喺和波肯定出線8強嘅大前提下，相信領隊恩格辛迪都會落柯打叫班球員穩打穩紮，踢法唔會太過進取，留力淘汰賽好過。
摩洛哥半場少入波

至於摩洛哥方面，確係幾令人失望，艾咸達奧、艾薩迪、貝漢達同貝拿迪亞等一班喺歐洲主流聯賽搵食嘅球員，潛質優厚嘅有、獨當一面嘅亦有，不過班波慘在八國聯軍咁款夾唔出火花。目前2分喺手嘅摩洛哥，話就話贏波就出線掂晒，和波要睇隔籬場波面色做人，但老實講，要砌低至今1球不失嘅南非談何容易吖！預料佢哋都會係穩中求勝格局，特別係呢班波近5戰有4場半場都開和，亦有4場係半場冇入波，踢法慢熱，對住南非，半場悶和係正路發展。

非國盃A組