海嵐一號贏得險潘頓保住榜首

猪拉多纳

潘頓呢輪畀韋達追到氣咳，尋日揸住一手好馬諗住嚟個大反擊，第七場嗰隻「喜勝多」仲係隻1.8倍嘅大熱，點知都係後上不及輸畀韋達嘅「好主意」，佢繼「雄心威龍」同「真誠真意」後連輸三隻唔夠2倍嘅苗廄大熱之餘，仲畀韋達追到平手。
       
海嵐一號（左）鼻位擊敗好心思，人馬發揮出色。

不過，潘頓都黑唔晒，到咗第九場佢就第一次騎葉楚航嘅「海嵐一號」出賽，最後二百米已經出頭，但拉士幾步「好心思」衝得好犀利，兩隻馬幾乎一齊衝線，好彩以鼻位影贏，幫潘頓保住一哥地位。賽後葉楚航都講返今場「海嵐一號」贏嚟有啲運，而佢仲話明鄭雨滇都佔極大功勞，事關阿滇喺晨課幫手教咗隻馬好耐，今次證明努力無白費。不過，航哥覺得呢隻馬陣上走勢仲係好急，未係好識留力，佢會再畀啲時間隻馬改善。