文路祖回歸撐華拉度列

猪拉多纳

今輪西甲由華拉度列主場迎戰畢爾包打頭陣，華拉度列今季主場表現可靠，加上次席射手文路祖剛由非國盃回歸更添火力，有力打低作客失波多到傻嘅畢爾包，主勝有2.25倍認真和味。

（now632台周六凌晨4:30直播）

華拉度列今季主場表現令人信服，近7次主場錄得4勝1和2負，唔好忘記輸嗰兩場對手係巴塞隆拿同皇家馬德里，實屬非戰之罪。雖然今仗有中場艾拔、域陀佩雷斯養傷，不過由於安哥拉喺非國盃出局，所以次席射手文路祖提早歸隊，配合佢哋連續10次主場都有波入嘅攻力，今場要射死畢爾包唔難。
畢爾包作客腳軟

另邊廂嘅畢爾包今季作客成績麻麻，只係贏過下游球隊CF格蘭納達同馬略卡，對住好似華拉度列差唔多實力嘅中游分子如利雲特、皇家蘇斯達就全部輸晒，最慘係佢哋今季聯賽10場作客，竟然失成27球咁誇張，成班後衞一到作客就會自動腳仔軟，點信佢哋可以喺今場搶到分？