弗賴堡團結就是力量

猪拉多纳

賀芬咸Money doesn,t score goals！

喺德國球壇，我哋經常會提到「奧圖大帝」利赫高喺80年代講過嘅經典名句：「Money doesn`t score goals！」字面解係金錢唔可以帶來入球，深入啲解係金錢不足以喺足球壇取得成功。嚟到2013年嘅今日，世界球壇金錢掛帥，車路士、曼城、巴黎聖日耳門及安治呢啲富豪球會喺花費大量金錢後都攞到一定成績，佢呢句名句喺某程度上似乎已經過時，不過Oliver可以解釋「奧圖大帝」名句當中深意，單靠金錢不足以搞好一支球隊，要喺球場上取得成功，仲需要戰略、鬥志、團結、良好組織、好教練、好管理、仲有大量嘅天才同埋耐心。

今晚德甲賀芬咸主場對弗賴堡（周六晚10時30分開賽）正好套用利赫高嘅名言，賀芬咸近年喺暴發富豪霍普支持下大灑金錢，早幾年喺德乙已經簽入丹巴巴亞、路爾斯古斯達禾、伊比斯域呢批球星，佢哋喺才華橫溢嘅教練蘭歷克帶領下的確曾經有過一段精彩時刻，不過當蘭歷克掛冠而去後，賀芬咸嘅光環亦告褪去，球隊表現每況愈下，今季上半季仲泥足深陷，成為德甲失波最多球隊，目前要為護級而戰。
賀芬咸新援難救近火

為咗拯救球隊，霍普決定再次大灑金錢，啱啱一口氣為球隊簽入多名新兵，包括來自基達菲嘅阿根廷中堅阿巴謙、來自慕遜加柏嘅射手迪甘馬高、來自巴勒莫嘅中場阿奎亞、來自緬恩斯嘅中場波蘭斯基，仲有來自熱刺嘅門將靴里奴高美斯，不過呢班球員大部分都喺球隊歇冬訓練營結束至到埗，尤其靴里奴高美斯前日至簽約，對一班後衞完全陌生，今晚賀芬咸畀佢打正選，等於叫佢打天才波，根本冇默契可言。
客軍教頭功力獲肯定

相反，弗賴堡係平民球隊嘅典範，冇金元冇球星，喺土生土長嘅勤奮教頭施特拉希帶領下默默耕耘，令佢哋成為2012年德甲最令人驚喜球隊，施特拉希亦當選為首循環德甲最佳教練，佢為球隊帶來嚴密防守同一套快速有效嘅進攻組織，每個球員都互相信任，落場成為一個團結一致、戰鬥力極強嘅整體。雖然不斷交出上佳表現，但由於球隊同球員都冇名氣，佢哋嘅戰鬥力時至今日仍然被莊家同外界低估，今晚作客面對各自為戰嘅賀芬咸力足坐和望贏，平手盤我捧客軍。
Oliver 推介：

弗賴堡平手盤 ★★★★

禾夫斯堡勝 ★★★★

多蒙特勝 ★★★★

Oliver

綽號：足球顧問

37歲，德國漢堡出生，現居於秘魯，曾於德國擔任報章及網上全職德甲及德乙球評人逾十年，亦曾為多家菠菜公司擔任操盤手，2009至2012年創辦收費足球資訊雜誌22Legs，今年起改任菠菜公司及大戶私人顧問，電郵：OliverBundesliga@gmail.com