AC迎巴神贏波甸番晚

猪拉多纳

「Balo！Balo！Balo！」，日前巴洛迪利飛抵米蘭後，機場內大約一千名支持者就起勢咁嗌巴洛迪利，AC米蘭球迷依家當正佢係英雄。老實講，就算卡卡重返都未必夠巴洛迪利咁多球迷接機。今晚AC主場對烏甸尼斯，聖西路球場接近八萬人都會係咁嗌Balo，震耳欲聾嘅聲音勢必令AC戰力大爭。今場比賽已成為巴洛迪利嘅歡迎晚會，烏甸尼斯只係以嘉賓身份到場當然識做，「讓球主勝」值得留意。（周一凌晨3時45分開賽）
士氣沸騰炒起烏甸

巴洛迪利去到AC米蘭，其中一個最開心就係艾沙拉維；查實兩位球員已喺意大利國家隊建立良好關係，操練時仲經常互相戲弄玩餐飽，帶畀隊友唔少歡樂，相信「巴神」轉投AC肯定開心到跳舞。需知道「巴神」係天才球員，心情比起狀態更為重要，只要佢心情靚，喺球場一定可以交出好表現。相反効力曼城期間，人人都笑佢兼當佢係透明人，爛玩到癲嘅「巴神」當然唔高興啦，落場比賽自然頭耷耷冇貨交。依家AC令「巴神」重生，也令到球迷對AC前景充滿希望，可以肯定一點，無論巴洛迪利今晚出場與否，AC米蘭都會被佢帶旺，烏甸尼斯慘敗唔出奇。