阿根廷孖寶冇態 曼城讓唔起利記

猪拉多纳

一月轉會市場完結，要數英超最大贏家肯定係利物浦。紅軍接連簽入史杜列治同菲臘比古天奴後，鋒力即時「升呢」，今晚佢哋作客曼城，受讓半一嘅下盤有1.78倍，勁抵玩！（有線200及300、廣東體育周一凌晨0:00直播）
紅軍穩守突擊專收勁旅

利物浦喺1月大執位，放走紐尼沙軒影響唔大，愈踢愈好嘅佐敦軒達臣都有能力勝任中場位置，而且佢哋位新兵史杜列治極速融入球隊，呢位英格蘭前鋒短短幾場波已經入咗3粒，最重要係佢同蘇亞雷斯勁夾，早幾日仲簽埋巴西進攻中場菲臘比古天奴返嚟幫手添，有呢幾位攻擊好手壓陣，紅軍鋒力的確唔講得笑。

事實上，利物浦嘅成績亦開始穩步上揚，近5場聯賽有3勝1和1負 ，周中作客阿仙奴一役更將穩守突擊戰術發揮得淋漓盡致，呢班波只要肯守，再用幾位高速鋒將反擊，隨時可以殺敗勁旅，今晚造訪曼城，絕對有條件照辦煮碗搵食。
曼城冇巴神擇使

相反，曼城送走巴洛迪利，有球迷覺得佢哋送走瘟神，但查實呢位意大利前鋒可以一己之力扭轉形勢，依家冇咗佢，有乜冬瓜豆腐都冇條件逆轉。最弊係阿古路傷愈無耐狀態不足，泰維斯又陷入球荒，上場被昆士柏悶和0:0就係最佳例子，波都入唔到，邊有能力讓利記？

頂占筍盤：利物浦（下盤）