華倫擋唔住巴塞

猪拉多纳

忠臣艾比達跳船損士氣

今晚西甲大戰有華倫西亞喺主場迎擊巴塞隆拿，雖然巴塞近兩次造訪米斯泰拿球場都未能全取3分，但「蝙蝠軍團」嘅陣容愈拆愈散，家陣連大忠臣艾比達亦極有可能離隊，令華倫嘅光輝年代正式畫上句號！好彩嘅係今場對手巴塞隆拿上周中惡戰過後，未必可以最佳狀態應戰，一於冷敲3.75倍「讓和」捧「地上最強」小勝啦！（now632台周一凌晨2:00直播）
射手蘇爾達杜傷愈狀態成疑

華倫西亞喺03至04球季最後一次奪聯賽冠軍、07至08球季捧走西班牙盃呢啲輝煌歲月已經不復再，近年面對債務危機更加不停賣走主力，當年助球隊橫掃多個冠軍、喺「華倫」踢咗15年嘅艾比達，亦喺日前宣布喺季尾有95%機會離隊，令人不勝唏噓！家陣隊波較具分量嘅球員，就只得啱啱復出嘅前鋒蘇爾達杜，不過「蘇大盜」傷咗一段時間狀態成疑，「蝙蝠軍團」近7次主場賽事又得3勝1和3負比較飄忽，今季第2次面對巴塞隆拿，好可能要再嘗敗仗。
戰畢皇馬體能消耗大吼「讓和」

至於巴塞方面，先唔好講韋拿同佐迪艾巴兩名倒戈兵，美斯近排疑似畀馬德里傳媒造新聞攻擊，今場肯定躁爆想拎一班「蝙蝠兵」嚟出氣，佢喺前日放假都返基地做物理治療務求回復最佳狀態，就證明呢位破紀錄連續11輪聯賽入波嘅「球王」着晒火！

之不過要留意「地上最強」近兩次造訪華倫都贏唔到波，而且其他主力啱啱周中先應付完皇家馬德里，狀態未必係最弗，今次就算全取3分都唔會易，睇怕都係要煲番煲魚生粥補吓身喇！
蝙蝠軍團輸往績

‧兩軍近10次碰頭，華倫西亞未試過贏波。

‧兩軍近6次對賽，有4次開出入球細。

‧美斯今季33次為巴塞披甲，當中有29場都有貢獻入球或助攻。
巴塞 華倫交手旺開細

巴塞火力所向無敵，近3季西甲每場平均入球都超過2.5球，不過神奇嘅係佢哋近6次作客華倫西亞都未試過入多過2粒，似乎係華倫西亞條防線對巴塞特別有計，不過「蝙蝠軍團」就仲差啲，近4次對賽夾埋只係入過2球，兩軍對壘可以話係開細嘅保證，2.65倍入球細諗得過。