AC雙子星撐起意大利

猪拉多纳

兩個人喺埋一齊最緊要啱Key、有火花，巴洛迪利同艾沙拉維絕對係天造地設嘅一對！呢對意大利箭頭由球會到國家隊都拍住上，今晚佢兩個會率領意大利鋒線進襲荷蘭，睇怕甩皮甩骨嘅「橙衫兵團」未必頂得住，一於撐意大利要1.75倍「讓客」。

（now632台周四凌晨3:30直播）

呢場重量級熱身賽喺阿姆斯特丹開戰，意大利鋒將基奧雲高因為大腿受傷退隊，不過費奧倫斯同迪亞文迪都可以頂佢個位，問題唔大。最重要係巴洛迪利同艾沙拉維勁有火花，兩個不嬲Friend底唔在講，周一凌晨仲夾手夾腳炮製兩個入波，幫AC米蘭以2:1砌低烏甸尼斯，今晚又再出動，真係戥冇乜國際賽經驗嘅荷蘭門將告魯爾擔心。
荷蘭出生力軍試陣味濃

意大利有派路、迪羅斯同保方一眾老波骨助陣，反觀荷蘭領隊尹戈爾就冇揀史奈達、雲達華治同洛賓等球星，反而話會畀機會約拿芬迪根斯文同戴利白蘭特等幾位生力軍落場攞經驗，試陣味勁濃。係，尹佩斯呢期係弗，但佢拍檔亨特拉爾近期跌晒Watt，樹大招風隨時冇啖好食，況且荷蘭歷來17次鬥意大利贏過3次咁大把，憑乜學人讓波呀？