紐卡素法革燃燒唔怕刺客

猪拉多纳

熱刺打加里夫巴利一個，難贏紐卡素「法國兵團」！今晚英超熱刺主場撼「喜鵲」，主隊有正箭頭迪科爾缺陣，艾迪巴約、丹普西又攰爆，「巴利仔」點勁都惡搞。紐記「法國革命」有睇頭，士氣如虹頂得住，受讓筍爆！

（有線300及200台周六晚8時45分直播）
熱刺缺迪科爾

若今仗熱刺贏波，有機會取代車仔做「英超三哥」，不過球隊陣容不整，難啃「紐記豬頭骨」。熱刺常規正選前鋒迪科爾要抖三周，今仗肯定倦勤；艾迪巴約雖剛踢完非國盃已經歸隊，但狀態肯定唔好，而丹普西又剛代表美國踢國際賽，就算推佢上前線，亦未必搵到着數。今仗賽前領隊保亞斯大讚加里夫巴利，話佢係「C朗二號」，事實上近兩仗，球隊都係靠佢入波攞分，可惜陣中冇人幫到佢。

紐記幾名法國新兵又平又正，近兩仗分別殺敗阿士東維拉同車路士，今仗有力一戰，蛇年想買樓？記得買紐記！