車路士新年「大」展鴻圖

猪拉多纳

今日大除夕先同大家拜個早年，祝各位心想事成，波運亨通！今晚好波連場陪球迷過節，車路士喺英超主場對韋根，1.48倍入球大最值得捧場，事關車仔今場有夏薩特坐完3場波監復出，火力更加強勁，當然係博佢哋「大」展鴻圖啦！

（有線200、300及廣東體育周六晚11:00直播）
夏薩特刑滿強攻韋根

夏薩特因為踢蠱惑執波仔被罰停賽3場，無論佢值唔值得同情，佢始終係車仔最有突破力嘅球員，有佢復出，近7場有6場至少攻入兩球嘅車仔火力肯定更旺盛，睇怕有大把入球睇。同時間，車仔防線勁多甩漏，門將施治又喺國際賽前傷埋，件防守中場約翰米基爾仲踢緊非國盃，少咗個人負責掃蕩，今場車仔入得又失得，相信好易開入球騷。

另一方面，韋根以往鍾意同強隊駁火，寧願輸都要輸得轟轟烈烈，雖然今季佢哋對阿仙奴同曼城開過入球細，首循環對車仔又只係輸0:2，但韋根現時中後場傷兵問題嚴重，絕對唔似可以保持清白，特別係淪為後備「車手」嘅費蘭度托利斯，應該會把握丹巴巴亞撞爆鼻休息，爭取入波避免被徹底棄用，只要韋根趁施治養傷偷雞入到波，入球大就穩陣嘞。