熱刺幫「里」發新年財

猪拉多纳

英法對決，熱刺主場鬥里昂，大家都知道熱刺主帥保亞斯靠帶領波圖捧歐霸盃成名，對呢項賽事有份情意結，希望重溫舊夢，證明身價洗脫被車仔炒魷嘅屈辱。因此，保帥一直以強陣出戰，爭標欲望極強。反觀，里昂重心始終放喺法甲，加上狀態回落，難擋熱刺強攻。

（周五4:05am 有線61及201台直播）
里昂心繫法甲

熱刺以前喺夏利列納執教下，多數派副選踢歐霸，主因係夏利叔目標只求歐聯入場券。不過保亞斯接手後，方針明顯有變，事關佢之前慘遭車仔炒魷，一直渴望交出靚成績，為自己正名，大小賽事都派強陣。加里夫巴利、迪科爾、艾迪巴約、艾朗連儂、丹普西等主力都係踢分組賽嘅常規人腳。

雖然迪科爾因傷倦勤，但最重要係加里夫巴利當勇，包辦球隊近三場英超四個入球，只要呢位威爾斯國腳披甲，熱刺勝算就大增。至於里昂同其他班霸一樣，眼中只有聯賽及歐聯，對歐霸並唔重視；呢支法甲二哥經過兩連敗後，已落後榜首巴黎聖日耳門六分，應會放更多精神改善聯賽成績，實在冇心情及多餘精力應付歐霸。