史雲斯再玩羅渣士

猪拉多纳

米高盧特立裝「假9」爆紅軍

今晚英超真假技術流正面交鋒，銳意踢地面進攻的利物浦，於主場迎戰正宗「西革」史雲斯。領隊羅渣士將上季於「黑天鵝」成功的地面戰套落紅軍，卻畫虎不成反類犬，相反史雲斯在前巴塞球星米高盧特立領軍後，表現更上一層樓，以米捷裝「假9」呢招更係一絕，加上利物浦剛作客俄羅斯攰爆，難讓「剋星」史雲斯，一於要「讓球客勝」。

（有線300及200台周日晚11時直播）

紅軍近期又湧出「海鮮味」，近四戰不勝，上場聯賽攻足80分鐘不果，最後輸畀西布朗0比2。而幾日前歐霸盃須作客嚴寒俄羅斯，面對辛尼特又吞兩蛋。事實上，利物浦呢兩場表現唔曳，創造出無數入球機會，可惜蘇亞雷斯多番糟蹋機會，對整體士氣造成極大打擊。目前紅軍於歐霸盃處出局邊緣，嚟緊周中就要踢次回合，呢隻盃係佢哋本季唯一捧盃希望，球員難免分心。而對西班牙足球推崇備至嘅紅軍領隊羅渣士，今季夾硬灌輸技術流打法，卻屢屢碰壁，未能重現上季帶史雲斯時的風采。
作客防守王K.O.過紅軍

史雲斯領隊米高盧特立喺球員時代以腳法細膩見稱，効力巴塞期間，佢正係名帥告魯夫麾下無鋒戰術嘅假中鋒，經常墮後拉開對方防線，為兩邊嘅史岱捷哥夫、碧格列斯坦輸送彈藥。今季米高盧特立轉教史雲斯後，眼見西班牙進攻中場米捷嘅神勇演出，令佢決定重拾無鋒戰術，冬窗重開即刻賣走射手丹尼格拉咸，以衝得撞得、跑動力強、後上入楔奇佳嘅米捷擔任「假9」，令對手防不勝防，而來自西甲嘅中場如柏保路靴南迪斯、約拿芬迪根斯文嘅加入，唔單止保持球隊傳統控球優勢，亦加強咗向前傳波嘅侵略性。

今季史雲斯表現同成績繼續「升呢」，球隊無論主、客場都充滿信心，對住勁旅都keep得住踢小組足球，於控球率方面不下於對手，所以失波勁少，本季聯賽僅失29球排失球最少第二，齋計十三場作客更只失10球，成為「作客防守王」。史雲斯同紅軍踢同一家波，但明顯略勝一籌，球員對上任領隊羅渣士瞭如指掌，本季兩鬥一勝一和，根本唔赦對手，呢場受讓好筍。