韋根出副選明益哈特斯

猪拉多纳

韋根火燒後欄喺英超深受降班威脅，所以今季往往派副選踢盃賽，擺明唔想要，對上兩圈英格蘭足總盃晉級過程亦好忟水，預料今晚16強作客英冠球隊哈特斯菲爾德，又會收起主將，留力聯賽搏殺。哈特斯菲爾德近七次主場不敗，受讓可捧「讓球主勝」。

（now635周日晚11時55分直播）
留力護級好過

韋根近幾季都係為護級而戰，今季衰到已跌落聯賽尾二，形勢岌岌可危。其實佢哋都有自知之明，難以兼顧盃賽，一早以副選踢足總盃，因此對上兩圈演出好曳，需要重賽先至淘汰甲組仔般尼茅夫。

去到上圈，韋根僅憑一球十二碼小勝非聯賽球隊馬爾斯菲1比0，根本冇心爭晉級，只因之前對手實力不濟，「無奈」贏波。值得一提，韋根下輪聯賽將惡鬥護級競爭對手雷丁，更加冇心情諗今場波，或者出局對韋根而言，反而係一個解脫。

哈特斯菲爾德呢類較低組別球隊，始終對足總盃有一份憧憬，除咗榮譽之外，如果取得佳績，隨時可以吸引大型企業贊助，甚至被大財團收購，爭勝誘因遠比收入豐厚嘅英超球隊大。哈軍今季主場演出一直非常硬淨，上次主場鬥英冠一哥卡迪夫城都唔使輸，絕對唔驚紙老虎韋根。