落難三兄弟 聯賽各安天命

猪拉多纳

近日環球假波醜聞滿天飛，上周中喺歐霸盃32強爆大冷輸波嘅馬德里體育會、拿玻里及被逼和嘅史特加，今晚回師聯賽再戰，究竟呢三支日前離奇失利嘅衰波，今仗會哀兵必勝？還是繼續沉淪？本報三大名家一於同大家研究吓！
史特加踢到殘打吡捧對家

德甲第22輪壓軸戲賀芬咸主場對史特加，既係巴登符騰堡州打吡，亦係護級大戰，賀芬咸賽前得到極大鼓舞，去年車禍命危嘅年輕中場球員波利斯胡錫域為球隊傳來打氣訊息，全隊士氣大振，面對態沉殘陣兼兵疲嘅史特加有力搶得救命三分，賀芬咸讓平半，黑柴撐上盤。

（有線61及201台周一凌晨零時30分直播）

賀芬咸今季開得曳，頭三場聯賽全敗，不過去到去年九月底終有起色，喺聯賽接連輕取漢諾威同史特加，佢哋喺九月廿七日作客大炒史特加三比○後，大批球迷都準備好等球隊凱旋回歸後慶祝一番，點知晴天霹靂，翌日即傳來胡錫域車禍命危嘅噩耗，對球隊造成沉痛打擊，球員喺陣中無法集中精神比賽，成績每況愈下，搞到要易帥換血。
賀芬咸為胡錫域而戰

經過歇冬期後，賀芬咸喺新帥馬高古斯帶領下已見明顯起色，兩場主場賽事一勝一和，新兵中堅阿巴謙同中場波蘭斯基演出優異，小將禾蘭愈戰愈勇，今晚主場迎戰史特加，會方已下必殺令。喺呢場大戰前，球會經理安祖亞斯梅拿更專程探望康復中嘅胡錫域，並帶來喜訊，呢位死過翻生嘅年輕中場不但可以對答如流，仲可以喺護士協助下步行，並託梅拿傳來訊息：「球隊目前處境不利，但我堅信可以護級成功，希望隊友、我哋嘅球迷能夠同我一齊加油！」當梅拿為胡錫域傳來呢番話，賀芬咸大營掌聲雷動，全隊士氣高昂。

史特加聯賽已經五連敗，偏偏佢哋又唔肯放棄歐霸盃，三日前強陣迎戰比利時亨克，主場畀人追和，首席射手伊比斯域今年仲食緊白果，佢對亨克踢足全場亦耗力多，球隊近期防線不斷送禮，今仗賽前更傳來兩名近況甚佳戰將伊巴謙查奧爾同端尼杜倫受傷，作客面對戰意十足嘅賀芬咸凶多吉少。