紐倫堡寒戰「威」番鋪

猪拉多纳

今季喺歐洲賽一直所向披靡嘅德甲球隊，上星期剛踏入蛇年後，除咗多蒙特歐聯作客贏唔到外，四支分別出征歐霸嘅德國球隊只能兩和兩負，惟有靠拜仁嚟緊對阿仙奴爭番口氣，呢隊班霸今季聯賽贏足十八場之外仲例必贏多過兩球，氣勢強勁！德甲迷有冇得威番次，就要睇佢哋歐聯爭唔爭氣。

漢諾威係其中一支剛出戰歐霸嘅德國波，上周中啱啱飛完去俄羅斯比賽，除咗舟車勞頓外，當地溫度零下十幾度，球員們都應該變晒雪條！小妹前年曾經訪問過幾支德甲球隊，佢哋表示喺冰天雪地之下比賽，體能一定會消耗得好勁。今晚紐倫堡當地應該係攝氏零度咁上下，最大問題係兩場波相距得幾日時間又要作客，無論身體適應或體力上都會打折扣。
漢諾威作客腳軟

再講，漢諾威近八場作客錄得一和七負劣績，佢哋今季聯賽十場作客埋單計埋失廿五球，而且陣中傷兵唔少，限制咗教頭史隆卡嘅調動。主隊紐倫堡形勢完全相反，最近只曾作客輸畀多蒙特，仲要近七場主場保持不敗。紐倫堡招牌菜就係遠射同自由球，今仗面對客軍漏洞多多嘅防線，想入波真係唔難，小妹希望清武弘嗣幫手殺退漢諾威啦！

（有線61及64台周日晚10時30分直播）
Kit推介：紐倫堡　主勝