皇馬成肚火 搵「簡奴」出氣

猪拉多纳

小妹喺大年初一向大家推介維拉平手勝，結果總算不負所託，嚟到年初八，小妹轉一轉口味玩西甲波，皇家馬德里今晚喺主場對華歷簡奴，1.43倍「讓球主勝」抵玩。係人都知皇馬喺西甲超晒班，今場波好多外地莊家都開皇馬讓2球或以上，難得足智彩個讓球主客和仲係「-1」，值得熱捧o架！

「銀河艦隊」陣中粒粒皆星，小妹周中都有捱夜睇佢哋喺主場和曼聯嗰場波，雖然皇馬最終開唔到W，不過佢哋幾乎全場都撳住紅魔嚟砌，只係對家門將迪基亞有超水準表現，先搞唔掂對手，家陣一眾「艦員」谷埋成肚火，係時候大勝一場吐一吐烏氣喇！
華歷簡奴11次作客失25球

係！皇馬今仗有前鋒希古恩、中場莫迪歷同守將艾比路亞停賽，但呢幾位仁兄唔係「艦隊」核心，希古恩唔掂？仲有賓施馬吖，莫迪歷就一向都唔係正選，艾辛客串右閘亦有出色表現，根本唔使擔心。最重要係佢哋位首席球星C朗弗到漏，近2仗就入咗4球，話就話皇馬喺聯賽9成輸畀巴塞啫，但係C朗都仲有權同美斯爭做神射手，大家見佢場場搏盡唔收油，就知呢位葡萄牙萬人迷堅想贏番美斯一鋪啦！

當然，華歷簡奴近況唔差，近8場取得6勝2負，依家只係比第3位嘅皇馬少9分，仲有權出席來屆歐洲賽，不過大家要留意「簡奴」輸嗰2場波都係作客，計埋呢2場，華歷簡奴今季11次客戰輸足7鋪勁失25球，名副其實係「地頭蟲」，今晚造訪巴拿貝球場，睇怕都係九死一生，大家捧「讓主」之餘，不妨玩埋6.5倍嘅「主其他」啦！
推介：皇家馬德里（讓球主勝）

微博傳情：過完年變肥妹

啱啱過咗農曆新年同情人節，今年收穫勁豐富，可惜除咗個荷包肥咗，我個人都肥咗唔少呢！又係時候要做運動修身啦！因為嚟緊要上鏡，喺另一個渠道同大家傾波經呀！