車仔踩行油 撞散賓福特

猪拉多纳

新年假期過咗喇，唉，小妹日日都「年初四」咁嘅面口，份雙糧又用晒，由原本嘅熱熱鬧鬧拜年變成一條友返工，嗰種感覺都真係幾悽慘。冇計啦，歡樂嘅時間過得特別快嘛，惟有做好自己，期待下個節日來臨啦！

講到悽慘，相信都冇乜邊個慘得過「車仔王子」費托喇。呢位前西班牙金童係小妹偶像嚟o架，又好波又好仔，可惜呢啲都係以前嘅事喇，家陣佢已經變成過街老鼠，以為杜奧巴走咗可以坐正啦，點不知又嚟咗隻「後生版魔獸」丹巴巴亞，由季初必然正選變成輪換，認真陰功。

查實「王子」一向都係實幹派，即使被人插都冇出一句聲，反而佢身邊啲朋友就不斷炮轟車路士，好似佢位隊友、以色列中場班拿約咁，日前就幫費托幫到出面：「球員同球會係要互相信任，車仔對佢嘅支持根本唔足夠。」
雙星回歸 Vs 兩將打柴

班拿約講得好啱o架，今晚車仔喺主場對賓福特踢英總第4圈重賽，前鋒又唔知會出「王子」定巴亞，賽前仲有消息話賓帥會用雙箭頭添，雖然小妹預計丹巴巴亞機會較大，不過都希望賓帥認真考慮吓「王子」，事關車仔啱啱喺歐霸盃砌低布拉格斯巴達，費托表現唔差，突然又擺番佢返後備席，好打擊士氣o架嘛！最重要係英甲仔賓福特搵錢大過天，爭升班點都重要過足總盃啩，就當佢哋搏，但10號仔艾阿拉古同右閘基雲奧干拿又打柴，實力大打折扣，點砌呀？

除咗費托回勇，車仔今鋪仲有泰利傷愈、非國盃冠軍功臣域陀摩西斯同米基爾歸隊，要炒賓福特開「-2」、有2倍嘅「讓主」應該唔難。
推介：車路士（讓球主勝）

微博傳情：食乜都冧

早幾日係小妹同男友過嘅第一個情人節，男友份禮物有心思夠特別唔在講啦，小妹最開心嘅，係佢肯親自下廚，啲嘢食雖然只係OK水準，不過誠意分爆燈，好開心呀！