華倫專心聯賽為上策

猪拉多纳

上周中歐聯比賽，兩支西甲代表皇馬及華倫西亞皆未能喺首回合主場取得優勢，其中華倫輸波之餘更失咗兩個作客入球，晉級形勢極為不妙。收拾心情後今晚佢哋回師西甲迎戰護級分子馬略卡，有望藉地利重返勝軌。

（now632台周一凌晨0:00直播）
馬略卡主帥開齋要等等

其實自主帥華維迪走馬上任之後，華倫嘅成績已經得到改善，佢哋依家喺西甲排第5，距離下屆歐聯參賽席位第4嘅馬拉加只有2分差距，既然歐聯失利，係時候喺聯賽發力爭入前4。好在「蝙蝠兵團」近期球員整體狀態不俗，門將古亞達上周作出多次精彩撲救力保不失，令希度華迪斯有機會喺完場前頭槌絕殺切爾達。呢位巴拉圭前鋒向來擅頂，每每後備入替建奇功成為華倫西亞英雄。至於中場班尼加雖然因傷休戰1年，惟今季復出之後慢慢重拾昔日巔峰狀態，肩負中場指揮官嘅重任做好派牌工作，亦係前一周成功喺巴塞身上搶分嘅一大功臣。

華倫今戰對手馬略卡近期亦換教頭，搵嚟擁有豐富西甲經驗嘅文沙路重掌馬略卡帥印，呢位已經第3度執教馬略卡嘅教頭，代表作當然係曾經喺2003年領軍勇奪西班牙盃。上周佢回歸後首次帶隊，雖然喺完場前憑基洛美入波逼和奧沙辛拿幸保不敗，可惜馬略卡今季作客戰績實在太差，近5戰1和4負狀態亦低沉，今戰作客對住華倫難有勝望，文沙路想打開勝利之門，惟有寄望下周返主場鬥基達菲啦！