史特加夢遊難掃克

猪拉多纳

歐霸盃比利時代表亨克主場鬥德國史特加，亨克首回合作客憑補時入球以1比1逼和對手，得以掌握出線主動權，今晚強勢於主場迎戰疲兵，甚有希望殺入16強，可惜馬會冇開讓球盤，Anton惟有選擇賠率較熱嘅1.52倍亨克「讓球主勝」。

（周五凌晨2時開賽）
亨克當世紀大戰踢

對於亨克嚟講，今場絕對係世紀戰，皆因比賽難得全歐洲直播，主場門票亦早已沽清，其實佢哋喺抽籤得知對手係史特加後，已經對再進一級抱有甚大期望，對手名氣雖大，但整體實力同表現已經唔係德甲強隊，首回合作客和波更加令全隊士氣大振。亨克喺分組賽能夠力壓巴素利同士砵亭以首名出線，證明今季進步明顯，佢哋喺比甲已經三連勝，包括大炒班霸布魯日4比1，目前狀態大勇，雖然有主力射手禾臣因傷缺陣，但取代佢嘅派列正係首回合入替佢之後為亨克建功，影響未算太大，首回合和波兼有作客入球，今場可以踢最擅長嘅穩守突擊，更有利發揮。

史特加啱啱喺聯賽關鍵戰擊敗賀芬咸，取得護級重要三分，不過球賽水準奇低，佢哋憑夏歷開波三分鐘頭球奠勝後，就冇乜好表現，全賴賀芬咸新兵多傷兵亦多，無法組織更有效埋門，球隊首席射手伊比斯域繼續夢遊球場，佢踏入今年仲未開齋，只能倚靠查伊巴謙查奧爾同夏歷打反擊，今場作客焗攻相當不利，以該隊近期表現同成績，根本冇條件讓波。
Anton推介：

亨克讓球勝★★★★

亨克大★★★

漢諾威大★★★