皇馬練定12碼 卡卡孭起B計劃

猪拉多纳

皇馬面臨兩項淘汰賽大戰，除今場西班牙盃之外，仲有下周中歐聯16強次回合作客曼聯，兩戰都可能需要互射12碼。皇馬為免重蹈上屆歐聯4強射12碼輸畀拜仁嘅覆轍，近日就苦練極刑，主帥莫連奴又特別演練卡卡最擅長嘅高速傳球及突入禁區，似乎想以呢位巴西中場作秘密武器。

皇馬上屆歐聯4強次回合同拜仁慕尼黑鬥到互射12碼，但4位主射球員之中竟有3人宴客，包括C朗、卡卡同沙治奧拉莫斯，實在失禮。「銀河艦隊」未來一星期將出戰兩場次回合生死戰，12碼隨時係成敗關鍵，莫連奴不敢怠慢，下令勤加練射。卡卡表現非常自信，相信已經擺脫陰影。事實上，佢近期狀態大勇，上仗聯賽更貢獻1入球及1助攻，成為反勝功臣。據悉，莫連奴已制訂以卡卡為重心嘅「B計劃」，當全世界目光都集中喺C朗身上時，卡卡可能先至係真正主角。